မေတ္တာပါရမီဟူသောစကား၌ မေတ္တာဟူသောပါဠိကို ရှေးဆရာတို့က ချစ်ခြင်း ဟူ၍အနက်မြန်မာ ပြန်ဆိုတော်မူခဲ့ကြသည်။ ပေမ ဟူသောစကားကိုလည်း ရှေးဆရာများက ချစ်ခြင်း ဟူ၍ပင်အနက်မြန်မာ ပြန်ဆိုတော်မူခဲ့ကြသည်။ မေတ္တာသဒ္ဒါဟောအပ်သည့် ချစ်ခြင်းကားအနက်ထူးဖြစ်၍ ပေမသဒ္ဒါဟောအပ်သည့် ချစ်ခြင်းကား သာမညဖြစ်သည်။ ထို့ကြောင့်ပေမ-အရချစ်ခြင်းကို-
၁။ တဏှာပေမ
၂။ ဂေဟဿိတပေမ
၃။ မေတ္တာပေမ --ဟူ၍သုံးမျိုးခွဲပြထားသည်။( မဟာဗုဒ္ဓဝင်၊ပ-တွဲ၊ပ-ပိုင်း။)
ထိုသုံးမျိုးတွင်---
တဏှာပေမဟူသည် မိန်းမနှင့်ယောက်ျားအချင်းချင်း တဏှာလောဘ၏အစွမ်းဖြင့် ချစ်ကြိုက်ကြခြင်းကို ခေါ်ဆို၏။ ဤတဏှာပေမကို အလင်္ကာကျမ်း၌ သိင်္ဂါရဟုခေါ်ဆို၏။(အဘိဓာန်၊၁၄။)
ဂေဟဿိတပေမ-ဟူသည်မိဘနှင့်သားသမီး၊ညီနှင့်အကို၊မောင်နှင့်နှမစသည်တို့အချင်းချင်း ချစ်ခင်တွယ်တာမှုကို ဂေဟဿိတပေမ-ဟုခေါ်၏။အိမ်၌နေခြင်းကို မှီ၍ဖြစ်သော ချစ်ခြင်းဟူ၍လည်း ခေါ်၏။(မဟာဗုဒ္ဓဝင်၊ပ-တွဲ၊ပ-ပိုင်း။)ဤချစ်ခြင်းကို အလင်္ကာကျမ်း၌ ဝစ္ဆလ-ဟုခေါ်၏။(အဘိဓာနပ္ပဒီပိကာပါဠ်၊သာမညကဏ္ဍဝိသေသျာဓိဝဂ်၊၈၉။) ဤတဏှာပေမ၊ ဂေဟဿိတပေမ၊နှစ်မျိုးလုံးပင် ကုသိုလ်တရားမဟုတ်ကြပေ။တဏှာပေမမှာ တဏှာရာဂဖြစ်၍ ဂေဟဿိတပေမမှာလောဘပင်ဖြစ်သည်။
၃။ မေတ္တာပေမ-ဟူသည် သူတစ်ပါး၏ အကျိုးစီးပွားဖြစ်ထွန်းမှုကို လိုလားခြင်းသည် မေတ္တာပေမ-မည်၏။ဤမေတ္တာသည် သူတစ်ပါးတို့နှင့် မခွဲမခြားအမြဲယှဉ်တွဲနေလိုခြင်းသဘောမရှိ။ လူအချင်းချင်း စကြာဝဠာတစ်ခုစီပင်ဝေးကွာ၍ နေရစေကာမူ ထိုဝေးကွာနေသူမှာ စီးပွားချမ်းသာဖြစ်သည်ဟု ကြားသိရလျှင် ကျေနပ်ဝမ်းသာ၏။ အတူမနေသည့်အတွက် ခတ်ခဲဝန်လေးခြင်းမရှိ။ သို့ဖြစ်၍ မေတ္တာတရားသည် စင်ကြယ်မွန်မြတ်သော သဘောတရားသာဖြစ်၍ -ဗြဟ္မဝိဟာရ-ဟူသောအမည်ကိုလည်းရ၏။ ဤတရားကိုပွားများ၍နေလျှင် မြတ်သောနေခြင်းဖြစ်သည်ဟူ၍ ဆိုလို၏။
မေတ္တာတရား သာမဟုတ်သေး၊ ကရုဏာတရား၊မုဒိတာတရား၊ ဥပေက္ခာတရားတို့သည်လည်း ဗြဟ္မဝိဟာရ-ဟူသောအမည်ကို ရကြကုန်၏။ ချစ်ခြင်းမေတ္တာတရားကို ပွားများရမည်ဆိုရာ၌ မစင်ကြယ်သောတဏှာပေမချစ်ခြင်း၊ ဂေဟဿိတပေမချစ်ခြင်းတို့မဟုတ်စေဘဲ စင်ကြယ်မွန်မြတ်လှသော မေတ္တာပေမတရားသာဖြစ်ရမည်ကို အထူးသတိပြု၍ မှတ်သားအပ်ပေသည်။
No comments:
Post a Comment